ការប្រកួតពានរង្វាន់យុវជន KMH CUP 2019 ត្រូវបានផ្លាស់ប្តូរម៉ោងប្រកួត ដោយសារទីលាន KMH Park នឹងត្រូវរៀបចំព្រឹត្តិការណ៍កីឡាបាល់ទាត់យុវជនអន្តរជាតិមួយ ដើម្បីអបអរទិវាកុមារអន្តរជាតិ ” KMH INTERNATIONAL YOUTH TOURNAMENT ” ពីថ្ងៃទី៣១ ខែឧសភា ដល់ថ្ងៃទី ១ខែមិថុនា ឆ្នាំ២០១៩។
គណកម្មការរៀបចំការប្រកួត ក៏បានសម្រេចលើកពេលប្រកួតវគ្គផ្តាច់ព្រ័ត្រ រវាង យុវជនបឹងកេតអាយុក្រោម ១៨ឆ្នាំ ទល់នឹងយុវជនវិសាខាអាយុក្រោម ១៧ឆ្នាំ ទៅម៉ោង ១៧:០០នាទីរសៀលវិញ។
សូមកុំភ្លេចចូលរួមគាំទ្រ និងលើកទឹកចិត្តដល់អ្នកកីឡាកររបស់យើងទាំងអស់គ្នា ក្នុងការប្រកួតផ្តាច់ព្រ័ត្រ ដណ្តើមពានរង្វាន់ KMH CUP 2019 ៕
គិតត្រឹមសប្តាហ៍ទី៩នេះ ខ្សែប្រយុទ្ធប្រេស៊ីលរបស់ក្រុមបាល់ទាត់បឹងកេត Eduardo Purcino បានកាប់កំណត់ត្រា ជាកីឡាករដែលរកគ្រាប់បាល់បានក្នុង ៦ប្រកួតជាប់គ្នា និងជាកីឡាករ Top Scorers របស់ក្លិបផងដែរ ។
ស្ថិតក្នុងតួនាទីជាខ្សែប្រយុទ្ធ Eduardo បានរកបានគ្រាប់បាល់សរុបចំនួន ៧គ្រាប់ហើយ ពោលគឺ ជាមួយកំពង់ចាម (២គ្រាប់) ជាមួយក្រសួងការពារជាតិ (១គ្រាប់) ជាមួយយុវជនសាលាបាល់ទាត់ជាតិ (១គ្រាប់) ជាមួយវិសាខា (១គ្រាប់) ជាមួយស្វាយរៀង (១គ្រាប់) និងជាមួយអាស៊ីអឺរ៉ុប (១គ្រាប់)។
ថ្លែងប្រាប់ក្រុមការងារ Boeungketfc.com កន្លងមក Eduardo ធ្លាប់បានលើកឡើងថា « ខ្ញុំ សប្បាយចិត្តដែលរកគ្រាប់បាល់ឱ្យក្លិប ព្រោះនេះជារឿងដែលខ្ញុំត្រូវតែធ្វើ ហើយខ្ញុំក៏អរគុណផងដែរដល់មិត្តរួមក្រុម ដែលតែងជ្រោមជ្រែងខ្ញុំ ពិសេស Gbenga ដែលតែងបញ្ជូនបាល់ល្អៗមកឱ្យខ្ញុំ »។
កីឡាករប្រេស៊ីលរូបនេះ ក៏បានបញ្ជាក់ច្បាស់ដែរថា៖ « កាលដែលខ្លួនមានវត្តមាននៅទីនេះ គឺដើម្បីឈ្នះពានរង្វាន់ ដូចនេះគ្រប់ការប្រកួតយើងតែងប្រាថ្នាចង់បាន ៣ពិន្ទុ ហើយមិនថាក្រុមខ្លាំងកម្រិតណាដែលយើងប្រឈមមុខនោះទេ យើងតែងចង់ឈ្នះ » ។
នៅលើបញ្ជី Top Scorers ក្នុងលីគកំពូលកម្ពុជា Eduardo កំពុងស្ថិតក្នុងចំណោមកីឡាករ ១០រូប ដែលមាន ៧គ្រាប់ តាមពីក្រោយបេក្ខភាពកំពូលតារាង Timothy របស់អង្គរថាយហ្គឺរ ( ១៣គ្រាប់ )៕
ក្រុមបាល់ទាត់បឹងកេត នឹងត្រូវប្រឈមមុខជាមួយក្រុមកំពូលតារាង ណាហ្គាវើល ក្នុងសប្តាហ៍ទី១០ នៃក្របខ័ណ្ឌលីគកំពូលកម្ពុជា រដូវកាល ២០១៩ ។
អ្នកស្រីប្រធានក្លិប ពុធ ធីតា បានផ្ញើសារលើកទឹកចិត្តកីឡាករ ក្រោយជ័យជម្នះ ៣-២ អាស៊ីអឺរ៉ុប អំឡុងពេលស្ថិតក្នុងបន្ទប់ផ្លាស់សម្លៀកបំពាក់ ថា៖ « ប្រកួតបន្ទាប់យើងត្រូវជួបណាហ្គាវើល ហើយយើងបាត់បង់ប្រធានក្រុមដែលទទួលពិន័យកាតក្រហម ដូចនេះខ្ញុំចង់ឱ្យអ្នកទាំងអស់គ្នា ដើរតួនាទីជាប្រធានក្រុមដោយខ្លួនឯង និងខំប្រឹងប្រែងប្រកួតដើម្បីក្រុមទាំងមូល » ។
« យើងបាត់បង់ប្រធានក្រុម១ តែយើងមានប្រធានក្រុម ១១នាក់ ដូចនេះត្រូវតែព្យាយាម ត្រូវតែកែប្រែចំណុចខ្វះខាតរបស់ខ្លួនក្នុងប្រកួតកន្លងមក ហើយធ្វើឱ្យបានល្អ » អ្នកស្រីបន្ថែម ។
គួរឱ្យដឹងផងដែរថា គិតត្រឹមសប្តាហ៍ទី៩ បឹងកេត ស្ថិតនៅលេខរៀងទី ៦ ឈ្នះ ៥ ស្មើ ២ និងចាញ់ ២ មាន ១៧ពិន្ទុ ចំណែកឯណាហ្គាវើល លេខរៀងទី១ ឈ្នះ ៨ និងចាញ់ ១ មាន ២៤ពិន្ទុ ។
ការប្រកួតនឹងចាប់ផ្តើមនៅម៉ោង ៦ល្ងាច នៅកីឡដ្ឋានកងយោធពលខេមរភូមិន្ទ ថ្ងៃអាទិត្យ ទី២ ខែមិថុនា ឆ្នាំ ២០១៩ ៕
ខ្សែការពារវ័យក្មេងរបស់ក្លិបបាល់ទាត់បឹងកេត កីឡាករ សឿត ណាវ៉ា បានថ្លែងប្រាប់ Boeungketfc.com ក្រោយពីខ្លួនគេរកបានគ្រាប់បាល់ដំបូងឱ្យក្លិប នៅក្នុងលីគកំពូលកម្ពុជា នៅសប្តាហ៍ទី៩ ដែលជួយឱ្យបឹងកេត ឈ្នះអាស៊ីអឺរ៉ុប ៣-២ កាលពីថ្ងៃសៅរ៍កន្លងទៅ។
ណាវ៉ា៖ « ខ្ញុំសប្បាយចិត្ត ហើយនេះជាប្រកួតទី៤ ដែលខ្ញុំមានឱកាសបង្ហាញខ្លួន ក៏ដូចជាជួយក្រុមទទួលបាន ៣ពិន្ទុបន្ថែមទៀត យ៉ាងណាមិញ ប៉ុននេះមិនទាន់គ្រប់គ្រាន់នៅឡើយទេ ខ្ញុំនឹងព្យាយាមបន្ថែមទៀត»។
« ដូចខ្ញុំធ្លាប់បាននិយាយរួចមកហើយ មិនថាកាលៈទេសៈណាក៏ដោយ បានលេងប៉ុន្មាននាទីក៏ដោយ ខ្ញុំនឹងព្យាយាមឱ្យអស់ពីសមត្ថភាព ដើម្បីជួយក្រុម » ។
គួររំលឹកថា សឿត ណាវ៉ា គឺជាកីឡាករយុវជនអាយុក្រោម១៨ឆ្នាំ ដែលរកគ្រាប់បាល់ដំបូងគេឱ្យ បឹងកេត ក្នុងលីគកំពូលកម្ពុជា ត្រឹមសប្តាហ៍ទី៩ ខណៈដែលរូបគេតែងទទួលបានការកោតសរសើរ ពីគ្រូបង្វឹក តែថារូបគេនៅមានចំណុចជាច្រើនត្រូវវិវត្តន៍ខ្លួនបន្ថែមទៀត។
ទស្សនាវីដេអូគ្រាប់បាល់ដំបូងរបស់ សឿត ណាវ៉ា៖
កាលពីថ្ងៃអាទិត្យ នៃសប្តាហ៍កន្លងទៅនេះ ក្រុមបាល់ទាត់បឹងកេត បានធ្វើដំណើរទៅប្រកួតសប្តាហ៍ទី៨ នៃលីគកំពូលកម្ពុជា ទល់នឹងក្រុមព្រះខ័នរាជស្វាយរៀង ដែលបញ្ចប់ក្នុងលទ្ធផល ២-២។
ចំពោះលទ្ធផលក្នុងជំនួបដ៏តានតឹងមួយនេះ កីឡាកររបស់យើង ៣រូប ដែលជាតួអង្គសំខាន់ក្នុងការប្រកួត បានបង្ហាញនូវចំណាប់អារម្មណ៍រៀងៗខ្លួន ដោយក្នុងនោះមានសម្តីសំខាន់ៗមួយចំនួនដែល ក្រុមការងារ Boeungketfc.com នឹងធ្វើការដកស្រង់មក។
អ្នកចាំទី យូ អាឡិចហ្សង់៖ « តួនាទីរបស់អ្នកចាំទី ប្រសិនបើយើងឱ្យគេទាត់ចូល ប្រៀបបីដូចទៅនឹងបរាជ័យ ដូចនេះខ្ញុំមិនសប្បាយចិត្តឡើយសម្រាប់ការធ្វើឱ្យរបូតគ្រាប់បាល់ទាំងនោះ »។
ខ្សែប្រយុទ្ធ Purcino Eduardo៖ « ខ្ញុំគឺជាខ្សែប្រយុទ្ធ ការរកគ្រាប់បាល់គឺជារឿងដែលខ្ញុំចាំបាច់ត្រូវតែធ្វើ ព្រោះបើមិនអាចស៊ុតបញ្ចូលទីបានទេ ខ្ញុំអាចនឹងអង្គុយនៅកៅអីបម្រុង » ។
ខ្សែប្រយុទ្ធ ឃួន ឡាបូរ៉ាវី៖ « ខ្ញុំសប្បាយចិត្តដែលរកគ្រាប់តាមស្មើឱ្យក្រុម តែក៏ចង់សូមទោសដល់អ្នកគាំទ្រស្វាយរៀង ចំពោះការអបអរផងដែរ ដោយសារសប្បាយចិត្តពេក ហើយក៏អរគុណដល់ស្វាយរៀង ព្រោះបើមិនមានស្វាយរៀងក៏ អត់អាចបង្កើត ឃួន ឡាបូរ៉ាវី បានដែរ » ។
គួររំលឹកថា នៅក្នុងការប្រកួត Purcino បានរកគ្រាប់នាំមុខក្រុមម្ចាស់ផ្ទះ ១គ្រាប់នៅចុងវគ្គទីមួយ តែក្រោយមក យើងក៏របូតគ្រាប់បាល់២គ្រាប់វិញ មុនពេល ឃួន ឡាបូរ៉ាវី ដែលប្តូរចូលក្នុងវគ្គទីពីរ រកគ្រាប់តាមស្មើវិញ និងចែកពិន្ទុគ្នាសម្រាប់ក្រុមទាំងពីរ ។
សប្តាហ៍បន្ទាប់ទៀត បឹងកេត នឹងត្រូវធ្វើដំណើរទៅប្រកួតសប្តាហ៍ទី៩ ជាមួយក្រុមអាស៊ីអឺរ៉ុបយូណាយធីត ដែលឈរលេខរៀងទី ៧ ក្នុងលីគកំពូលកម្ពុជារដូវកាល ២០១៩។
ការប្រកួតប្រព្រឹត្តិទៅនៅម៉ោង ៣:៣០នាទីរសៀល នៅកីឡដ្ឋាន AEU Sport Park ៕
គិតមកទល់នឹងពេលនេះ ការប្រកួតពានរង្វាន់ KMH CUP 2019 វគ្គជម្រុះក្នុងដំណើរឆ្ពោះទៅកាន់វគ្គផ្តាច់ព្រ័ត្រ បានឈានចូលដល់វគ្គពាក់កណ្តាលផ្តាច់ព្រ័ត្រហើយ រវាងក្រុមយុវជនភ្នំពេញក្រោន និងក្រុមយុវជនវិសាខា ខណៈដែលក្រុមការពារជើងឯកឆ្នាំចាស់ យុវជនព្រះខ័នរាជស្វាយរៀង បានធ្លាក់ក្នុងវគ្គជម្រុះ ។
កាលពីថ្ងៃសៅរ៍កន្លងទៅនេះក្រុមទាំងពីរបានប្រកួតស្មើគ្នា ក្នុងលទ្ធផល ១-១ ហើយនឹងត្រូវកាត់សេចក្តីដោយប្រកួតជើងទីពីរម្តងទៀតនៅថ្ងៃសៅរ៍ សប្តាហ៍នេះ វេលាម៉ោង ២៥ ខែឧសភា វេលាម៉ោង ៤រសៀល ។
គួរបញ្ជាក់ថា ក្រុមដែលឈ្នះក្នុងវគ្គនេះ នឹងត្រូវឡើងទៅជួបយុវជនបឹងកេត នៅវគ្គផ្តាច់ព្រ័ត្រដណ្តើមពានរង្វាន់ KMH CUP 2019 ដែលនឹងធ្វើឡើងនៅថ្ងៃទី ១ ខែ មិថុនា វេលាម៉ោង ៤រសៀល៕
តើអ្នកគាំទ្រទាំងអស់គ្នាគិតថាក្រុមមួយណា នឹងឡើងទៅវគ្គផ្តាច់ព្រ័ត្រ ?
អត្ថបទទាក់ទង៖ កីឡាករថ្មី ២រូប នឹងចូលរួមជាមួយយុវជនបឹងកេត ត្រៀមវគ្គផ្តាច់ព្រ័ត្រ KMH CUP 2019
ខ្សែប្រយុទ្ធជួរមុខរបស់ក្រុមបាល់ទាត់បឹងកេត កីឡាករ ឃួន ឡាបូរ៉ាវី បាននិយាយរៀបរាប់អំពីការចូលរួមជួយក្រុម ប្រកួតប្រជែងពានរង្វាន់នានា ក្នុងរដូវកាល ២០១៩នេះ ដោយបង្ហាញពីឆន្ទៈ និងទំនុកចិត្តខ្ពស់។
ថ្លែងប្រាប់ក្រុមការងារ Boeungket.com ក្នុងថ្ងៃសុក្រនេះ បូរ៉ាវី បង្ហាញអារម្មណ៍ថា៖ « ចំពោះការរៀបចំរបស់ក្លិបយើង សម្រាប់រដូវកាលថ្មីនេះ គឺបានល្អច្រើនជាងឆ្នាំរាល់ដង ដោយមានការយកចិត្តទុកដាក់ ពីថ្នាក់ដឹកនាំ ក្រុមគ្រូបង្វឹក និងកីឡាករទាំងអស់ ហើយបច្ចុប្បន្នយើងមានកីឡដ្ឋានខ្លួនឯងដើម្បីហ្វឹកហាត់ផងដែរ ដូចនេះគឺអ្វីៗកាន់តែប្រសើរឡើង » ។
និយាយអំពីការតាំងចិត្តក្នុងក្រុមវិញ កីឡាករមានស្រុកកំណើតនៅខេត្តកំពង់ចាមរូបនេះបន្តថា៖ « ការខំប្រឹងហ្វឹកហាត់របស់ខ្ញុំ គឺដើម្បីធ្វើយ៉ាងណាជួយក្រុមទទួលបានជ័យជម្នះ មិនថាខ្ញុំលេងបានតិច ឬច្រើននោះទេ ឱ្យតែមានលទ្ធភាពអាចលេងបាន ខ្ញុំនឹងព្យាយាមអស់ពីសមត្ថភាព » ។
គួររំលឹកថា ការបង្ហាញខ្លួនក្នុងនាមជាកីឡាករបំរុង របស់ ឃួន ឡាបូរ៉ាវី គឺតែងរកគ្រាប់បាល់ឱ្យក្រុម ក្នុងនោះ ១គ្រាប់ទល់នឹងខេត្តកំពង់ចាម និង១គ្រាប់ទៀតទល់នឹងវិសាខា ។
ក្រៅពីនេះអតីតម្ចាស់ស្បែកជើងមាសពានរង្វាន់លីគកំពូលកម្ពុជារដូវកាល ២០១៣ បានសង្កត់ធ្ងន់ថា៖ « ចំពោះទម្រង់លេងវិញ យើងអត់អាចកំណត់ខ្លួនឯងបានទេ ព្រោះវ័យយើងកាន់តែចាស់ហើយ គ្រាន់តែថា រាល់ពេលហ្វឹកហាត់ និងប្រកួត គឺខ្ញុំតែងតែខំប្រឹងឱ្យអស់ពីសមត្ថភាព »។
សូមជម្រាបជូនផងដែរថា បឹងកេត នឹងបន្តជួបជាមួយក្រុមកំពូលតារាង ព្រះខ័នរាជស្វាយរៀង នៅកីឡដ្ឋានស្វាយរៀង ក្នុងថ្ងៃទី ១៩ ខែ ឧសភាខាងមុខ វេលាម៉ោង ៦ល្ងាច ៕
លោក Ratchakith Vasunan ក្នុងតួនាទីជាអនុប្រធានក្លិបបឹងកេត បានបកស្រាយបញ្ជាក់អំពីដំណើរវិវត្តន៍នៃការសាងសង់កីឡដ្ឋានរបស់ក្លិប ដែលកំពុងតែដំណើរការសាងសង់បានរហូតដល់ទៅ ៨០ភាគរយហើយ។
ថ្លែងប្រាប់ក្រុមការងារ BoeungKet.com កាលពីពេលថ្មីៗនេះ លោកអនុប្រធានបានរៀបរាប់បញ្ជាក់ថា៖ « គ្រប់យ៉ាងកំពុងដំណើរការទៅមុខល្អ ហើយមកទល់ពេលនេះ យើងសម្រេចបានប្រមាណជា ៨០ភាគរយហើយ អ្វីដែលយើងត្រូវការពេលវេលាបន្ថែមដើម្បីឱ្យរួចរាល់ គឺដោយសារតែយើងចង់ឱ្យកីឡដ្ឋានរបស់យើង បំពេញតាមលក្ខខ័ណ្ឌស្តង់ដារ ហើយម្យ៉ាងវិញទៀតគឺយើងគិតអំពីសុវត្ថិភាពរបស់អ្នកទស្សនា » ។
« ដំបូងគម្រោងរបស់យើង គ្រោងនឹងបញ្ចប់ក្នុងពេលដ៏ឆាប់ខាងមុខនេះ តែក្រោយពីមានការពិភាក្សាជាមួយក្រុមអ្នកជំនាញ គឺកន្លែងអ្នកទស្សនាត្រូវការបុកគ្រឹះ ដើម្បីធានាដល់សុវត្ថិភាពអ្នកទស្សនា » ។
សូមបញ្ជាក់ផងដែរថា ក្រុមវិស្វករដែលកំពុងសាងសង់កីឡដ្ឋានថ្មីរបស់យើងនេះ គឺសុទ្ធតែជាក្រុមការងាររបស់លោកអនុប្រធានក្លិប ដែលមានបច្ចេកទេស និងជំនាញច្បាស់លាស់។
ចំពោះបច្ចុប្បន្នភាពនៃការសាងសង់ វិវត្តន៍ទៅមុខយ៉ាងណានោះ ក្រុមការងាររបស់យើង នឹងជម្រាបជូនជាបន្តបន្ទាប់ទៀត ៕
នាពេលថ្មីនេះ សហព័ន្ធកីឡាបាល់ទាត់កម្ពុជា បានបង្ហាញនូវបញ្ជីឈ្មោះកីឡាក យុវជនអាយុក្រោម ១៩ឆ្នាំបឋមសរុប ៣០រូប ដើម្បីចូលរួមធ្វើតេស្តសមត្ថភាព ត្រៀមប្រកួតជម្រើសជើងឯក យុវជនអាស៊ាន អាយុក្រោម ១៩ឆ្នាំ ២០១៩។
ក្នុងចំណោមកីឡាកទាំងនោះ ក៏មានវត្តមានយុវជនពីក្លិបបឹងកេតផងដែរ ដោយរួមមានកីឡាករ ខ្សែប្រយុទ្ធ ជឿន ពិសាខបរមី លី ម៉ាឯល នី បញ្ញា ខ្សែបម្រើ ហ៊ត ឈិនជិន ខ្សែការពារ ស្រ៊ី ពិសិដ្ឋ អ្នកចាំទី សឿន សុភ័ក្រ្ត របស់ក្រុមយុវជនអាយុក្រោម ១៨ឆ្នាំបឹងកេត និង ខ្សែការពារ សឿត ណាវ៉ា របស់ក្រុមធំ។
កីឡាករទាំង ៧នាក់របស់យើង នឹងចូលរួមជាមួយយុវជនដទៃទៀត ចាប់ផ្តើមប្រមូលផ្តុំនៅថ្ងៃទី ១២ ខែ ឧសភា ឆ្នាំ ២០១៩ ហើយនឹងចាប់ផ្តើមធ្វើតេស្តសមត្ថភាពលើកទីមួយ ពីថ្ងៃទី ១៣ ដល់ទី ១៥ ខែឧសភា នៅសាលាកីឡាបាល់ទាត់ជាតិបាទី ។
សូមជូនពរដល់យុវជនរបស់យើង ទទួលបានលទ្ធផលល្អក្នុងការធ្វើតេស្ត និងជោគជ័យក្នុងភារកិច្ចដ៏សំខាន់នេះ ៕
បន្ទាប់ពីឈ្នះប្រកួតសប្តាហ៍ទី៦ លើក្រុមយុវជនសាលាបាល់ទាត់ជាតិ លទ្ធផល ៣-១ មានន័យថាក្រុមបាល់ទាត់បឹងកេត បានរំកិលទៅកាន់លេខរៀងទី៤ ក្នុងតារាងពិន្ទុប្រចាំសប្តាហ៍ នៃលីគកំពូលកម្ពុជា ដោយមានពិន្ទុស្មើគ្នា នឹងវិសាខា ពោលគឺ ១៣ពិន្ទុ និងបន្ថយគម្លាតពីតំបន់កំពូលតារាង ៣ពិន្ទុ។
គ្រូបង្វឹករបស់យើង លោកគ្រូ ហៅ សុជាតិ បានបង្ហាញអារម្មណ៍ក្រោយចប់ការប្រកួតថា៖ « ពួកយើងគឺធ្វើបានល្អក្នុងថ្ងៃនេះ (ថ្ងៃអាទិត្យ) តែអ្វីដែលសោកស្តាយ គឺយើងមានឱកាសច្រើន ធ្វើមិនបានល្អ » ។
« លទ្ធផលនេះគឺមិនដូចទៅនឹងអ្វីដែលយើងគិតទុកនោះទេ ដោយសារតែ យើងរំពឹងថា ឈ្នះទទួលបាន ៣ពិន្ទុ ហើយរកគ្រាប់បាល់បានច្រើន ហើយមួយវិញទៀត គឺយើងភ្លាត់ឱ្យយុវជនបាទី រកគ្រាប់បាល់បានមុនទៀត » ។
អំពីការប្រកួតវិញ យុវជនសាលាបាល់ទាត់ជាតិ បានរកគ្រាប់បាល់នាំមុខនៅនាទី ទី៦ ដោយកីឡាករ ប៊ុនធឿន ប៊ុនណារ៉ុង និងបន្ទាប់មកត្រូវកីឡាករបរទេសរបស់បឹងកេត រកគ្រាប់តាមស្មើវិញនៅនាទី ៤២ ដោយ Julius ខណៈនៅក្នុងវគ្គទីពីរ កីឡាករ Julius និង Eduardo រកគ្រាប់បាល់បន្ថែមទៀត រហូតដល់ចប់ការប្រកួត ៣-១។
នៅសប្តាហ៍ទី ៧ ខាងមុខ បឹងកេត នឹងបន្តជួបគូប្រកួតដ៏ខ្លាំងមួយទៀត គឺ វិសាខា ដែលប្រព្រឹត្តិទៅនៅថ្ងៃ សៅរ៍ ទី១១ ខែឧសភា ឆ្នាំ២០១៩ ៕